Nafıa nezaret-i celilesinin varid olan bir kıta tezkiresi evrak-ı muhtelife ile beraber meclis-i valaya ita buyurulmağla daire-yi kavanin ve nizamatta kıraat ve mütalaa olundu hülasa-yı müeddası saye-yi maarif-vaye-yi hazret-i padişahanede halka meccanen okuyup yazmak ve tarih ve coğrafya gibi şeyleri öğretmek için cemiyet-i tedrisiye namıyla melfuf pusulada nam ve unvanları muharrer bazı zevattan mürekkeb bu kerre teşekkül etmiş olan cemiyet tarafından mekteb ittihaz olunmak üzere münasib bir yer tahsis istida olunmuş ve Örücüler? civarında hal ü harab bulunan mektebin ledel-keşif melfuf defterde gösterildiği vechle sekiz bin üç yüz kuruş masrafla vücuda geleceği anlaşılmış olduğundan ol babda icab eden şerait ü vezaif hakkında cemiyet tarafından tanzim kılınmış olan nizamname layihasıyla cenab-ı nezaretten itası iktiza edecek ruhsatname müsveddesinin takdimiyle istizan-ı keyfiyetten ibaret bulunmuş olmasıyla iktizası ledel-müzakere cemiyet-i mezkure mücerred halka meccanen neşr-i ulum u maarif etmek niyetiyle teşekkül etmiş ve bu misüllü vesait-i tahsiliyenin umum hakkında müstelzim-i fevaid olacağı derkar bulunmuş olduğuna ve salifüzzikr layiha ve ruhsatname müsveddeleri dahi yolunda ve icab-ı hale muvafık olarak mekteb-i mezkurun tamiri için gösterilen masraf dahi cüziyattan bulunduğuna binaen ber-muceb-i işar cemiyet-i mezkurenin ol vechle teşekkülüne ruhsat itası münasib görülerek evrak-ı merkume leffen takdim kılınmış olmağla nezd-i sami-yi asafanelerinde dahi şayan-ı tensib buyurulduğu halde keyfiyetin nezaret-i mişarünileyhaya havalesi ve mekteb-i mezkurun ol suretle icra-yı tamiri dahi evkaf-ı hümayun-ı nezaret-i celilesine emr ü izbar buyurulması lazım geleceği muhat-ı ilm-i ali-yi vekalet-penahileri buyuruldukta emr ü ferman hazret-i men lehül-emrindir.

fi 14 Şevval sene 1280 ve fi 9 Mart sene 1280         

Mühürler

(…) (okunamadı)

(Es-seyyid Ahmed Kemal)

(Es-seyyid Muhammed Nuri)

(Es-seyyid Yusuf Kamil)

 Çeviren: Flagellum Dei